ලංකාවාසී සුවහසක් බෞද්ධ ජනයාගේ ප්‍රසාද සංවේගය ජනිත කරවා බුද්ධත්වයේ සංකේතය ලෙස පූජනීය වූ ශ්‍රී මහා බෝධීන් වහන්සේගේ දක්ෂිණ ශාඛාව අද වැනි පින්බර පොහොය දිනක උරුම වීම ලක්දිව බෞද්ධයා ලද මහත් වූ භාග්‍යයකි. දොළොස් මහේ පොහොය අතුරින් උඳුවප් පුර පසළොස්වක පොහොය ලාංකේය වනිතාවට සුවිශේෂී වූ දිනයකි. සංඝමිත්තා මහ රහත් මෙහෙණින් වහන්සේගේ ලංකාගමනය සිදු වූයේ අද වැනි උඳුවප් පුර පසළොස්වක පොහොය දිනකය. ලොකු කුඩා සෑම දෙනෙක්ම පාහේ බලා සිටින සුමන සමන් දෙවිරදුන්ගේ ආරාධනාවෙන් රහතන් වහන්සේලා පන්සියයක් සමඟ සමනොළ කන්දට වැඩම කළ ගෞතම මුණිඳුන්ගේ වම් පාදස්පර්ශයෙන් පූජනීයත්වයට පත් කළ ශ්‍රී පාදස්ථානය කරුණා කිරීම ඇරැඹෙන්නේ ද උඳුවප් පුර පසළෙස්වක පොහොය දිනයේ සිට ය. සම්මත වර්ෂ අවසානයේ යෙදෙන උඳුවප් පුර පසළොස්වක පොහොය මෙවන් සුවිශේෂී සිද්ධීන් රැසක් නිසා සමස්ත බෞද්ධ ජනතාවට සුවිශේෂිත වූ දිනයක් බවට පත් වී ඇත.
මෙවන් වැදගත් සිදුවීම් රාශියක් සිදුවී ඇතත් උඳුවප් පොහොය සිරිපා කරුණා කිරීමට බලාපොරොත්තුව සිටින මිනිසුන්ට නව ජීවයක් ගෙනෙමින් කරුණා සමයේ ආරම්භය සනිටුහන් කරයි.
බුදුන්ගේ ජීවමාන සිරිපතුල දැකබලා වන්දනාමාන කර ආපසු පැමිණීමට යන ගමනේ ඔබත් සැදැහැවත් පරිසර හිතකාමී බෞද්ධයෙක් ලෙස කටයුතු කිරීමට වග බලා ගන්න. 
මේ අතර බෞද්ධයන් අද දිනයේ නොයෙක් පිංකම්වල නිරත වෙමින් පොහොය දිනය අර්ථවත් කර ගනියි.
Written By: –
Rtr. Rusiru Dhananjaya
(Senior Blog Team Member 2024-25)
Edited By: –
Rtr. Sawandi Thisarani
(Junior Blog Team Member 2024-25)
