ඩවුන් සින්ඩ්‍රෝම් දැනුවත් කිරීමේ මාසය

ඔක්තෝබර් මාසය ඩවුන් සින්ඩ්‍රෝම් දැනුවත් කිරීමේ මාසය ලෙස වෙන් කර ඇති අතර, ඩවුන් සින්ඩ්‍රෝමය ඇති පුද්ගලයින් පිළිබඳ සමාජයේ දැනුවත්භාවය වැඩි කිරීමත්, ඔවුන්ව පිළිගැනීම ප්‍රවර්ධනය කිරීමත් මේ මාසයේ සිදු කරනු ලබයි. බොහෝ සංවිධාන සහ පුද්ගලයින් මෙම මාසය තුළ දී විවිධ ක්‍රියාකාරකම් සඳහා සහභාගී වේ, ඒ අතර ඩවුන් සින්ඩ්‍රෝම් පර්යේෂණ සහ උපදේශනයට සහාය වීම සඳහා අරමුදල් රැස් කිරීමේ ව්‍යාපෘති, පා ගමන්, දිවීමි ඇතුළත් වේ. ඩවුන් සින්ඩ්‍රෝමය, ඩවුන් සහලක්ෂණය ලෙසද හඳුන්වයි. මෙම වචන එතරම් හුරු පුරුදු නොවුනත් අපට එදිනෙදා ජීවිතයේ මුණගැසෙන, හොඳින්ම හඳුනන “විශේෂ අවශ්‍යතා ඇති පුද්ගලයන්” මෙලෙස හඳුන්වයි.

ඩවුන් සින්ඩ්‍රෝමය යනු ජාන විකෘතිතාවයක් හේතුවෙන් ඇති වන රෝගී තත්ත්වයකි. මිනිස් සිරුර නිර්මාණය වී ඇති වර්ණදේහ 46 සැකසී ඇත්තේ මවගෙන් වර්ණදේහ 23ක් හා පියාගෙන් වර්ණදේහ 23ක් ලෙස යුගල 23ක් ලෙසයි. එයින් 21 වැනි වර්ණදේහයේ අමතර පිටපතක් සෛල පද්ධතියට එකතු වීම නිසා ඇතිවන ජානමය ව්‍යාකූල තත්ත්වයක් ලෙස ඩවුන් සහලක්ෂණය ඇති වේ. මෙය සෑම උපත් 700කටම එකකට පමණ බලපාන අතර, ලොව වඩාත් සුලභ වර්ණදේහ ආබාධය ලෙස ද හැඳින්විය හැක. මෙම ජාන විකෘති තත්ත්වය ඇති වීමට බලපාන නිශ්චිත හේතුවක් තවමත් සොයාගෙන නැති නමුත්, දරුවා පිළිසිඳ ගැනීමේ දී මවගේ වයසෙ හි යම් බලපෑමක් මීට ඇති බව සැලකේ. එහිදී මවගේ වයස අවුරුදු 35 ට වැඩි වීම මෙවැනි දරුවෙකු ලැබීමේ අවදානම වැඩි කරයි.

ඩවුන් සින්ඩ්‍රෝමය සහිත පුද්ගලයින්ගේ ඇතැම් භෞතික සහ බුද්ධිමය ලක්ෂණයන් හි පසුගාමී ස්වරූපයක් පෙන්නුම් කරයි. ප්‍රමාද වූ වර්ධනය, කථන සහ භාෂා අපහසුතා මෙන්ම මෙම තත්ත්වය සහිත පුද්ගලයන් අතර සමාන බාහිර පෙනුමක් එනම් මුහුණේ සහ ශරීරයේ පැහැදිලි වෙනස්කම් කිහිපයක් ලෙස පැතලි මුහුණු පැතිකඩක් සහ කුඩා උස වැනි භෞතික ලක්ෂණ ද පෙන්නුම් කරයි. එසේම මීට අමතරව හෘද රෝග, තයිරොයිඩ් ඌණතාවය, අක්ෂි ආබාධ, ශ්වසන රෝග, ආහාර ජීර්ණ පද්ධතිය ආශ්‍රිත ආබාධ, හා ශ්‍රවණාබාධ ඇති වීමේ අවදානමක් ද මොවුන්ට තිබිය හැක.වෛද්‍ය ප්‍රතිකාරවල ප්‍රගතිය සහ දැනුවත්භාවය වැඩි වුවද, මෙම පිරිස තවමත් සමාජයේ බොහෝ අභියෝග සහ බාධකවලට මුහුණ දෙයි. ඔවුන්ව වෙනස්කොට සැළකීම, අධ්‍යාපනය සහ සෞඛ්‍ය සේවා සඳහා සීමිත ප්‍රවේශයක් ලබා දීම සහ සමාජ හුදකලාව අත්විඳීමට සිදු වීම මේ අතර වේ. කෙසේ වෙතත්, ඉක්මන් මැදිහත්වීම සහ සමාජයීය සහාය ඇතිව ඩවුන් සින්ඩ්‍රෝමය ඇති බොහෝ පුද්ගලයින්ට යහපත් ජීවිතයක් ගත කිරීමට මග සලසා දිය හැක. මෙම විශේෂ අවශ්‍යතා ඇති පුද්ගලයන්ට මෙන්ම ඔවුන්ගේ පවුල්වලට ද උපකාර වන ප්‍රධාන සංවිධානය ලෙස ගෝලීය ඩවුන් සින්ඩ්‍රෝම් පදනම හැඳින්විය හැකි අතර ඔවුන් එම තත්ත්වය ඇති පුද්ගලයින් සඳහා පර්යේෂණ හා වෛද්‍ය ප්‍රතිකාර සඳහා අවශ්‍ය අරමුදල් සපයයි.ඩවුන් සින්ඩ්‍රෝමය ඇති පුද්ගලයින්ට උපකාර කිරීමේ වැදගත්ම ක්‍රමයක් වන්නේ අධ්‍යාපනයයි. මෙයින් අදහස් කරන්නේ ඔවුන්ගේ සම වයසේ මිතුරන්ට හා සමාන අධ්‍යාපන අවස්ථා ලබා දෙන අතරතුර ඔවුන්ගේ නිශ්චිත අවශ්‍යතා සහ හැකියාවන් ආමන්ත්‍රණය කිරීමයි. මෙය විශේෂ අවශ්‍යතා සහිත සිසුන්ට ප්‍රතිලාභ ලබා දෙනවා පමණක් නොව, සියලුම සිසුන් අතර විවිධත්වය සහ පිළිගැනීම ප්‍රවර්ධනය කරයි. අධ්‍යාපනයට අමතරව, ඔවුන්ව සමාජය තුළ පිළිගැනීම ප්‍රවර්ධනය කිරීම සඳහා ප්‍රජා සහභාගීත්වය ඉතා වැදගත් වේ. මෙයට ප්‍රාදේශීය සිදුවීම් සහ ක්‍රියාකාරකම්වලට සහභාගී වීම, ආබාධ සහිත පුද්ගලයන්ට උපකාර කරන සංවිධාන සමඟ ස්වේච්ඡාවෙන් ඉදිරිපත් වීම, ඔවුන්ව සහ ඔවුන්ගේ පවුල් දැන හඳුනා ගැනීම ඇතුළත් වේ.ඩවුන් සින්ඩ්‍රෝම් දැනුවත් කිරීමේ මාසය තුළ, මෙම පුද්ගලයින්ගේ ජයග්‍රහණ සහ දායකත්වයන් සැමරීමට අපට අවස්ථාවක් ඇති අතර, ඔවුන් මුහුණ දෙන අභියෝග පිළිබඳව දැනුවත් වීමටද හැක. විශේෂ අවශ්‍යතා ඇති පුද්ගලයින් ද සාමාන්‍ය පුද්ගලයන් මෙන්ම අද්විතීය පෞරුෂයන්, දක්ෂතා සහ හැකියාවන්ගෙන් හෙබි අය බව හඳුනා ගැනීම වැදගත්ය. ඔවුන්ට ද අන් අය හා සමානව ගෞරවයෙන් සැලකිය යුතු අතර ඔවුන්ගේ සම්පූර්ණ හැකියාවන් කරා ළඟා වීමට අවස්ථාව සලසා දිය යුතුය. සමාජයීය විවිධත්වය වැළඳ ගැනීමෙන් සහ සියලු පුද්ගලයන්ගේ හැකියාවන් හඳුනා ගැනීමෙන්, සෑම කෙනෙකුටම දියුණු වීමට අවස්ථාව ඇති වඩාත් දයානුකම්පිත සමාජයක් නිර්මාණය කළ හැකිය.